介绍:
《不一样的卡梅拉》
[法]克里斯提昂.约里波瓦 著
[法]克里斯提昂.艾利施 绘
郑迪蔚 译
二十一世纪出版社出版
第一集，我想去看海
好！现在开始是小鸡们下蛋个辰光咾！交交关关个小鸡侪开始生蛋。哦哟！有个小鸡痛的唻哇哇哇穷哭喽！
“哦！多么可爱个蛋啊！”鸡妈妈们开心的勿得里个了！只有小鸡卡梅拉，伊拒绝下蛋。
“下蛋下蛋下蛋！一天到怪就晓得下蛋！生活当中勿是应该有的更加好白相个事体吗！”
卡梅拉更加欢喜听鸬鹚佩罗讲大海里个故事。佩罗老早去过交关地方，尽管有辰光伊讲闲话欢喜带点夸张个成分，但是卡梅拉还是对搿牌故事相当着迷！
“总有搿能介一天，我也要去看看大海！”
一天夜到头，又到了应该回鸡棚睏觉个辰光了。
“我勿想睏觉！我再也勿想搭其他小鸡一样唻！我想去看大海！”
“去看海？侬先搞搞清爽自家是啥人然后再来考虑搿只问题好伐！”卡梅拉个爸爸觉着再也呒没比搿还要戆个想法了！“侬看看我，出去旅游过一趟伐？侬要晓得，大海！大海是侬搿种小鸡随随便便就好去白相个地方伐？豪稍进去！睏觉！”
搿天夜里向，卡梅拉睏辣床浪向，眼乌珠巴登巴登朝牢天花板看，满脑子侪辣辣想大海个事体。
“勿来三！我真个要去看海！我现在就去！”卡梅拉轻轻个跳下床，迓迓较推开房门，回头看了看伊个爸爸妈妈兄弟姐妹们最后一眼，就离开了屋里向，朝牢伊梦想当中个大海走的去！
卡梅拉一个人孤零零，辣辣墨黜乌里黑个夜里勇敢前行！伊走啊走啊，走啊走啊，走了老远老远，走的唻伊个一双罪过八腊个小脚爪都快要呒没知觉了。
到了早浪向，当伊立辣一只沙丘个顶浪向，朝另外一面看个辰光。眼面前个一切让伊惊讶的唻简直勿敢相信，搿是真个！
“哇！大海！真个是大海！哪能介漂亮啊！比佩罗讲个还要漂亮！”
搿是多么奇妙个景色啊，白颜色个浪花辣辣大海高头翻滚！一歇歇惊天动地个冲上来，一歇歇又轻声细语个退下去。
卡梅拉先是辣辣沙滩高头白相，堆城堡，拾贝壳。肚皮饿了乃就凿几只小虾米吃。
后手来伊索加直接跳进海里向白相，咕咚吃了老大一口海水。“啊呸呸呸！哪能介咸啊！”
伊咳嗽了几声，就又寻了一块木板，白相起了冲浪！伊一歇歇游泳，一歇歇潜水，一歇歇滑行，还辣辣海里向，射尿尿！伊开心得笑啊笑，笑了停也停勿下来！
天色慢慢个暗下来了，卡梅拉想回去了。但是挨下来搿桩事体拿伊吓煞脱了！海岸线竟然寻勿着了！根本分辨勿出东南西北！屋里向辣辣嚡里只方向啊！
“呜呜呜呜！爸爸！妈妈！”欧！卡梅拉呒没见脱了！小鸡又吓又急，拼命个哭！但是啊，四周围侪静悄悄！呒没任何一只声音回答伊！
卡梅拉忒衰瘏了，伊趴辣木板浪向睏着了。搿辰光，只有天高头个月亮，照射辣伊孤零零个身影高头。
辣末生头，三艘老漂亮个大帆船出现辣海面高头！原来，搿是克里斯托弗.哥伦布个船队，伊拉正辣辣发现新大陆个路浪向。
卡梅拉一记头拨惊醒了，伊拼命个叫救命“喂！听到伐！小鸡！有只小鸡辣海里向！”
卡梅拉个闲话还呒没讲光，就拨一只老大个浪头卷到了圣母玛利亚号个甲板高头！
“啊哈！一只小鸡！豪稍拿搿只小物事个毛拔拔清爽，烧了吃脱！”船长哥伦布发布了命令。
卡梅拉当然勿想就搿能介拨吃脱。伊快点帮自家解释，伊讲伊勿辞辛苦，走了交交关关个路，好勿容易就是为了来看海！
“关脱！我勿想听侬个废闲话！”哥伦布勿耐烦了，“拿伊带下去烧汤！”
“慢较！船长！”卡梅拉急中生智个叫起来，“鸡蛋！为了丰富侬个早饭，我保证每天早浪向侪生一只鸡蛋！搿是专门为侬生个鸡蛋！”伊紧张的唻上下牙子也辣辣打相打，心里想，“哪恁办？哪恁办？我从来呒没生过鸡蛋，妈妈又勿辣身边，都呒没人教我！”
卡梅拉开始尝试下蛋，伊蹦啊跳啊，爬高，倒立，仰卧，凡是伊能想到个办法侪用过了。
“哇，生只蛋真个瞎难呀！”
“啊哈，成功啦！我生了一只蛋，我生了一只蛋！”
就搿恁，眼乌珠一霎个功夫，伊拉已经辣辣大海高头航行了几个礼拜了。搿天早浪向，刚刚生好第三十一只蛋个卡梅拉看到老远个地方出现了海岸线搭仔一望无际个森林。卡梅拉发现了美洲新大陆！
“啊？一只白颜色个小母鸡？哪恁介漂亮啊！”
卡梅拉朝前头走了几步，有眼难为情个打了声招呼，“侬好，我叫卡梅拉！”
“侬好，我叫皮迪克。”
“我是从一个老远老远个地方来个，辣辣埃面，大海个埃面边。”卡梅拉指牢大海讲。
“喔，真啊？从介远个地方过来！”
“侬个毛真红啊，皮迪克！”
“侬也老好看个，卡梅拉！来，我带侬去看我个爸爸妈妈伐！”
“爸爸妈妈，㑚看我带啥人来搭阿拉一道吃夜饭啦！”
夜里向，大家为了迎接贵宾卡梅拉举行了盛大个宴会。
“皮迪克，我想问问侬。为啥体㑚搿搭个鸡屁股浪向侪是光秃秃个？”
“哎，侪是因为印第安人拿阿拉屁股高头最好看个羽毛拔得去做头冠了！”
“卡梅拉，走！我带侬去一个好地方！迓迓较，覅让人家看到！”
“是伐，好个呀！哦，我可以，可以再拿一个黄颜色个糖果伐？”
“搿勿是糖果，是珍珠米。”
伊拉一边白相，一边茄山河，“卡梅拉，侬有兄弟姐妹伐？侬屋里向是哪能样子个？”卡梅拉一听来劲了，大谈特谈自家个老家是啥个样子，还聊到自家个好朋友鸬鹚佩罗。
“搿位朋友真有劲！”皮迪克心里向搿能想。
“嘿！卡梅拉！”
“啥事体？皮迪克！”
“如果侬愿意，明朝我带侬参观一下我个家乡。”
皮迪克带牢卡梅拉到处白相，伊拉有的讲勿光个闲话，伊拉侪觉着从来也呒没介开心过！
“皮迪克，我哪能听到有的印第安人敲铜鼓个声音？”
“勿是鼓声。是我个心跳的忒快了，因为有侬辣辣我个身边！”
从此之后，卡梅拉搭仔皮迪克一日到夜黏在一道。
“哈哈，看看搿对小情人！哈哈，看看搿对小情人！”
辰光过了老快，眼睛一霎，哥伦布又要扬帆起航，要出海了！
皮迪克深深个爱上了卡梅拉，伊决定跟卡梅拉一道走！
皮迪克依依不舍个跟屋里向个人告别。
“呜呜呜！”妈妈伤心个哭了，辛辛苦苦养了介大个小人，要跟人家远走高飞了，罪过啊！
几个礼拜之后，卡梅拉带牢皮迪克开开心心个回到了自家个屋里！
“嘿，快看！是啥人回来了！”
“是卡梅拉！卡梅拉回来了！”
“妈妈！”
“喔，我个乖囡！侬回来了，豪稍让我看看！喔！侬长大了！成为了一个可爱个大姑娘！搿位卖相介好个小伙子是啥人？”
“我叫皮迪克！”
“欢迎侬来！皮迪克！”
第二年个春天，卡梅拉搭皮迪克养下来了伊拉头一个小人。一个老可爱个小公鸡。伊拉决定帮伊起名字叫卡梅利多。
几个号头以后，“卡梅利多，好回来了！”卡梅拉叫伊个宝贝儿子回去睏觉。
“再等一分钟嘛！妈妈！”
“要睏觉唻！”
“睏觉睏觉老是睏觉！真呒没劲！我再覅像其他小鸡一样唻，就晓得睏觉！”卡梅利多发牢骚，“生活当中肯定有得比睏觉更加好白相个事体！咳！对了！我想有一颗星星！”
大家还在听
