介绍:
尔有弗有噶种感觉过，有一件毛要紧嗰事体，必须要去做嗰。如果弗去做伊是不成功嗰。问题是，尔就是弗想去做。尔坐嘞椅子哴，尔睏嘞眠床哴，尔走嘞楼梯哴⋯⋯尔就想做一样事体，该样事体就是物事事体也弗做。尔心里厢相当苦闷，胸口头交关气闷，好像全世界顶顶苦嗰就是尔自家。尔感觉自家好像走到了崩溃嗰边哴，接落来嗰任何时刻，自家都有可能一脚淖落去，跌进深渊，万劫不复。
拜菩萨哭耶稣，求爹爹告娘娘，统统呒不用，伊拉又听弗见，眼流水啊好像要出来快了欸。该个时光，尔想到了死，尔想到了自杀，尔想到了跳楼⋯⋯但是尔胆子小呀，尔还弗想死呀！从楼高头瘪嗒一击掼嘞地哴，多少痛哦！要是掼嘞个半死赖活，该恁套办呀！一想到自家徕该种别人家有可能会得去寻死嗰状况里厢还活徕咚，想想看，搭死比起来，或者讲搭去寻死比起来，还是蛮好嗰么！
有物事办法哩，尔只好硬着个头皮去做嗰喏。该个，就是人生。尔拉猜得着我个冒徕咚做物事事体让我噶罪过弗啊？
大家还在听
