原创沪语歌曲：合肥路个味道

MV：http://v.qq.com/page/b/4/3/b018750al43.html 词、曲、唱、制作：郑耀华 | 歌词 | 合肥路个味道要从小菜场闻起 黄陂路口中药房里暗龊龊侪是抽屉 古柏堂个隔夜垃圾加小洋刀厂油耗气 粘脂脂竹头躺椅，九点半仍旧热气 侪在讲夜到大雨 下只角有一股味道 上只角也有股味道 人从小闻介多味道 大起来七颠八倒 老清老早雨落之到脚馒头介深 五颜六色漂油水，啥人只卷笔刀在氽 搲过倒粪站搲过煤球厂墨水厂大门 落汤鸡小鬼乱奔，人来疯拥牢校门 对过是淡水邨 下只角有一股味道 上只角也有股味道 人从小闻介多味道 大起来七颠八倒 淡水邨侪外国房子，一个中学生穿过 外国房顶外国烟囱圆个窗口吊棉毛裤 三楼阳台外地女生伊拉海军爸爸派头赫大 再穿过重庆南路又开始洋房赫多 出去是思南路 下只角有一股味道 上只角也有股味道 人从小闻介多味道 大起来七颠八倒 思南路上侪是荫头，墙头插碎玻璃 呒没声音呒没人影，侪在翻译小说里 教室隔壁复兴公园，打瞌充闻着花个香味 第一趟想女同学，第一趟会哼哀乐 第一趟偷吃香烟 下只角有一股味道 上只角也有股味道 人从小闻介多味道 大起来七颠八倒 毛老头有交关理想 手一撸，讲“统统一样” 喔唷喂，擎呤咣打 弄下来白忙一场 下只角有一股味道 上只角也有股味道 啥人讲侪老有味道 要么伊碰着赤佬