介绍:
上海“模子”大全
“模子”搿个词，勒拉上海人的言话里相用得邪气多，意思是讲一个人勒拉社会浪响混得蛮好，有实力、有魄力，阿拉就称依为“模子”。上海的工厂是最先规模工业化格，制造业要开模子，专业一眼，叫“模具”。老底仔个老师傅伐叫“开模具”，叫“开模子”，模子开好了，之后出来个产品，就会质量过得了关，厂长就会过来表扬一句：“模子灵的！”后来，上海闲话里就多了一句，形容两个人老像的闲话：“一只模子里刻出来格”。
个么，“模子”哪能会变成切口勒呢？这就要从“文化革大命”讲起睐了。勒拉唉腔辰光，侪是以弄堂为管理单位格，每条弄堂里向，侪有一个最狠的角色，大家侪叫伊“一只鼎”。如果每条弄堂侪有“一只鼎”么，啥人又是最狠格呢？个么，就请两个“一只鼎”来“配模子”，啥意思？打相打，模子要匹配才可以啊！配好“模子”么，就要开始“拉场子”了。比如讲，侬是XX里出来的，“侬“枪势”浓伐？有本事，跟阿拉弄堂的来配配看模子？！” 搿恁介一讲么，两个“一只鼎”就要“对开”了，也就是北方人说格“单挑”。两条弄堂的人排成两排，互相握手，还要讲一句“向侬学习！”——真是相当有当年《三国志》里向打仗的气场。
“撬边模子”“连档模子”
上海话“撬边模子”，跟还有一种模子非常接近，这就是“连档模子”，北方人常把这种人称作是“托儿”。搿个“撬边”，有两种意思，一种是讲做衣裳缝边，拿布边往里向卷进去，再缝，为了不露针脚。另一种意思是讲马路浪向非法交易当中，出货一方有一个合伙人，假面假样冒充买么事个客人，勒拉旁边配合，常庄假装也感兴趣，造成商品紧俏或价格邪气便宜个感觉，噱人家上钩。上世纪20年代，上海滩还流行一种敲诈行个为。流氓常庄雇佣女人，暗当中去噱其他男人赌博，万一发生事体，伊拉也可帮助流氓逃脱。
同样道理，“连裆模子”（上海话，串通一气的意思）最早的来源，也是脱仔裁缝有关系。侬想，如果裆部不是连勒一道格，两个裤脚管还叫裤脚管么？改叫“袜套”好了！葛唠讲，好事体勒拉一道做，上海言语叫“搭档”，这个是“档次”的“档”；坏事情一到做，上海人就会用“连裆”，“裤裆”的“裆”。
“滑头模子” “半吊模子”“小刁模子”三光模子” “脱底棺材”
上海闲话非常咂劲，本来一个“模子”么就够咧，还要加上交关“浇头”，比方讲，“模子”可以比喻一个人的体型，也可以比喻一个人讲义气，胆量大，总归是一句好的言话。别过，当“模子”前头加上“浇头”了，个么好了，“模子”额味道就变脱了——“滑头模子”、“三光模子”、“小刁模子”，只只侪伐是好的“模子”。“滑头模子”是指一些油滑、不守信用个人；“半吊模子”是讲唉眼不内行、资格弗老个人；“小刁模子”是指刁钻阴险、会用心计个人，有辰光也会指一些抠门个人。
个么“三光模子”是啥意思呢？老底子，抗日战争个辰光有一个“三光”政策，是指杀光、烧光、抢光。战争年代是老早就过去了，现在的“三光”是指吃光、用光、当光个人。所以，“三光模子”也是一只“脱底棺材”的“月光族”！还有交关“模子”，毛估估也只有老上海会晓得了。“吃精模子”，啥意思？有好处冲勒拉前头，吃亏个事体，揠勒拉后头，要逃的，叫“吃精模子”。
打桩模子”
前两年，周立波个海派清口《笑侃三十年》，让“打桩模子”又回到了上海人个生活里向，个么，“打桩模子”到底是哪能“打桩”的呢？最早出现“打桩模子”是勒拉文革辰光，互相之间调换毛主席像章，有的人有两只一样的，个么拿去跟别个人换一只自己呒没个，乃么，勒拉换个辰光就发现，哎，我一只比较稀缺，或者质地比较好，可以换对方两只、三只，这样就形成了一个市场。后来，“打桩模子”出现个地方换到了电影院门口，调换电影票了。调毛主席像章是不好看到钞票个，而电影票就不一样了，基本浪就是为了赚钞票，葛唠，当年电影院门口倒电影票个“打桩模子”交关多，我印象当中，八十年代，大光明门口经常是一长条个“打桩模子”。票子倒伐出去，个么，自己享受，进去“孵空调”也好个——这应该就是上海滩的第一代“打桩模子”。
后头呢，改革开放初期，上海有了“出国人员服务部”。啥意思？如果一个人出国，个么，依回来可以带一两件么事，有个时候，他出去趟数多了，想要的么事侪买好了，手浪向个大件进口商品个额度又呒没用脱，好，“黄牛”来了，收脱侬个额度，再高价倒卖拨需要的人。
老上海，侬还记得金陵东路外滩个“友谊商店”伐？记得“兑换券”、“侨换券”伐？“友谊商店”门口头的“打桩模子”，绝对是上海滩当年个一大风景。而且有劲咧，“打桩模子”有标配的：人么“精精瘦”，晒了“墨赤黑”，天热么一条“西短”（西装短裤），衣裳呢，“梦得娇”，管伊“正卡”、“大卡”（上海话，正版和假货），人人一件，就像是工装服一样。
大家还在听
