介绍:
《小猪唏哩呼噜》
第廿八集，鸡棚捉鬼
上趟讲到，小猪猡唏哩呼噜出名了，大家侪当仔伊做了纠察，还有一个功夫老高个徒弟。老古闲话讲了好，人怕出名猪怕壮。葛唠啊，侬看，鸡太太就来寻唏哩呼噜了。一满面孔个惊慌，身浪向毛侪竖起仔，迓迓较搭小猪猡讲。伊屋里向有鬼，叫小猪猡大师无论如何帮帮忙。
“还呒没搬的去个辰光，我就听讲搿幢房子勿清爽。时常部有的赤佬走来走去。偏偏阿拉老公勿相信，嘻嘻哈哈，还讲我神经病。现在倒好，伊先拨吓的唻，蹲到招待所去了。”
小猪猡呆了半日天，一句闲话也呒没讲，伊辣辣想“纠察应勿应该管赤佬个事体。”最后，伊犹犹豫豫个问“搿只鬼，长啥个样子啊？”
鸡太太讲“样子讲勿清爽，有常是模子老大，一只高到房顶。有常是模子又老小老小。还有常是末是只黑影子。后头影子也呒没了，就是阴嗖嗖个风。哎，要是真个拨侬看到，可能就呒没介吓人了。断命个就是看勿到伊，辣末生头辣辣侬头颈后头吹口气，侬讲搿多少吓人啊。”
小猪猡问“葛末伊出来做啥呢？”
“侬讲搿只赤佬啊？倒也呒没做啥，就是忒吓人了。”
小猪猡讲“嗨，伊又呒没咬㑚，又呒没打㑚，㑚覅去睬伊勿就好了嘛！哦哟我想起来，阿拉妈妈叫我去买酱油个。我假使耽误伊烧夜饭，乃末伊定规要请我吃生活了。鸡太太，再会！”
鸡太太一把拉牢伊“对，我想起来了，伊敲脱我两只鸡蛋！”
小猪猡讲“哦，搿肯定是老虫做个！阿拉屋里上趟也来了的两只老虫，拿我个皮球也偷脱了！”
“勿对！”勿是老虫，阿拉屋里已经呒没老虫了！再讲，老虫偷鸡蛋是为了吃！鬼偷鸡蛋是为了吓人！“啪，啪！”两记，那鸡蛋敲碎脱！蛋壳就厾了埃面搭。”
哦，搿能介倒是勿像老虫做个事体，小猪猡又讲“哦哟，敲两只鸡蛋，又啥好吓个啦？又勿是敲骷朗头！”
鸡太太朝小猪猡看看，小心翼翼个问“是勿是，呃，是勿是小猪猡大师搭阿拉普通老百姓一样个，也怕鬼？”
大师哪能可能会的怕搿排物事，小猪猡大师直接讲“啥人怕啦？走！侬带路，我跟侬去看看较！”
“哎，等脱歇！大白天啥地方去寻鬼啊？鬼末侪是半夜三更再出来个呀！小猪猡大师还是夜里向再来伐！侬现在勿是急了去买酱油嘛？去伐去伐！”
“夜里向去打搅㑚，搿多难为情啊！”
“搿侬放心好唻，我也领仔小人，一道蹲到招待所去了！老古闲话勿是讲“嫁鸡随鸡”嘛！葛咾侬啥人也打搅勿着！”
小猪猡一记头叫起来“啊，搿能一来，就我一家头啊？”
“小猪猡大师还担心啥？”
“哦，哦呒没啥？我就是觉着主人家也勿辣辣，就我一个人，总好像勿大合适！”
“侬搿是啥个闲话乃，别人家我可能信勿过，但是侬小猪猡大师，我是放一百廿只心，绝对相信侬！哦对了，还有桩事体我要提醒侬。鬼搿样物事对伐，一定要灯关脱伊再会得出来，如果侬灯开辣嗨，侬肯定捉勿着伊个。侬应该勿怕黑个，对伐？”
“呃，勿...勿怕！”鸡太太拍拍伊个肩胛，笑笑讲“我就晓得！侬哪能会得怕黑呢！如果连灯也勿管关，还叫啥个小猪猡大师啊！”
鸡太太拿院子个钥匙，房子个钥匙，统统交拨了小猪猡大师。讲了一句“等侬个好消息！”然后伊就走了。
哎！大师勿就是应该乐于帮助别人嘛！想到此里，小猪猡一记头勇气百倍！
刚刚吃好夜饭，小猪猡就拿牢一根木棒头，冲到鸡太太屋里去了。
搿搭乃，阿拉要帮小猪猡讲句闲话。伊倒也勿是因为胆子小再拿根棒头过去个。毕竟伊是大师嘛！武林高手，总归要有把武器伐。有个末用刀，有个末用剑，阿拉搿位大师呢，是用棒头个！
小猪猡到了鸡太太屋里，先里里外外检查了一下，又敲了敲墙壁搭仔地板。墙壁搭地板侪发出“空空空”个声音，好像空心个嘛。小猪猡开始有点慌了，面孔也开始抽筋了。接下去伊对自家讲，“哦哟，我忘记脱了，我出来之前，也应该敲敲看屋里个墙壁还有地板个，估计也是搿种“空空空”个声音。侬覅自家吓自家！”搿能伊讲末，伊心里向稍为好了一点，呒没介吓了。伊又辣辣房间里看了一歇，觉着有眼衰瘏，伊就搬了一把小矮凳靠牢墙壁坐下来，拿灯关脱。
房间一黑，小猪猡又有点勿自然了。伊走夜路个辰光有的一只好办法，就是编只顺口溜。搿歇点，伊又开始编咾！“大鬼是只屁，屁是一股气！”讲好搿两句，伊自家也觉着好笑，伊又继续讲“勿怪是热气还是冷气，反正侪呒没关系！”讲是呒没关系，但是伊还是想起来鸡太太讲过个头颈后头吹气个闲话。伊朝四周围看看。一片黑洞洞。伊头颈一缩，“呃，搿个勿大好白相，我还是调一只伐。”接下去伊又讲，“纠察胆子顶顶大，天勿怕，地勿怕！啥人来捣蛋，我一棒头敲的伊地浪向爬！”搿能伊讲，小猪猡个心里适宜多了。
伊拿搿句闲话翻来覆去讲了一遍又一遍，一直到一个“第一怕”出来了。啥是伊个第一怕？就是怕吃力，想睏觉了。伊拉猪家门个人乃，第一怕吃力，第二怕饿肚皮。只要一想睏觉或者肚皮饿哦，怕鬼搿种侪排到后头去了。小猪猡大师搿只骷榔头冲发冲发，差点掼下去。伊豪稍坐坐正。但是过脱一歇歇，伊又开始冲发冲发。最后啊，伊索性朝地浪向一趴，木棒头末也掼了旁边，小矮凳末也扣了伊身高头。小猪猡哼了一句“嗯，吃力煞脱了。”伊就搿能，一动也勿动，睏着了。
伊睏个辰光并勿长，房间里有啥个物事发出“扑棱”一记声音。虽然搿记声音并勿响，但是小猪猡还是一记头就惊醒了。搿事体对伐，有辰光就是介怪。越是轻个声音，越是容易让人产生警觉。小猪猡仍旧睏了地板浪向，一动也勿敢动，两只耳朵竖起仔穷听。伊觉着有啥人从背后头轻轻较个朝伊走过来，辣辣一个头颈高头，吹了一口气。“呼！”帮鸡太太讲的唻是一式势样，外加这股气乃还是瀴笃笃阴森森个。
小猪猡吓的唻浑身个寒毛统统竖起来了的，伊想起来前头开灯检查个辰光像煞看到墙角落头有的一只大筐，伊拿盖头捎开来个辰光，看到里向有的三四十只鸡蛋。当时伊就想哦，假使伊迓了搿里头，肯定比躲辣床下头要安全的多。因为平常伊如果迓起来个说话，伊拉妈妈头一桩事体就是拿床单捎开来，再看看伊是勿是迓辣床下头。葛咾啊，床下头顶勿安全。
小猪猡决定利用一下搿个筐子，伊鼓足勇气，“嘿！”一记头跳起来，豪稍窜到筐子里向，再拿盖头盖了严严实实。好！乃末看上去安全多了，鬼也拿伊呒没办法了伐！吹勿到伊头颈了。
小猪猡头笡起仔一门心思个听房间里向个动静。房间里向末鸦雀无声。勿晓得是盖头盖了忒紧，听勿出呢，还是搿只鬼已经跑脱了。
筐子里乃还铺了交关干草，小猪猡觉着软咚咚老适宜个，过脱歇，伊又睏着了。
搿一觉睏个辰光就勿短咾，伊又就听到地板高头有的“笃笃笃笃”个声音。伊还当仔是半夜三更唻，葛咾浑身个寒毛又竖起来了。伊想起来，鸡太太搭伊讲过，有辰光搿个鬼是从地底下头钻出来个。接下去个事体，就更加吓人了，有两只毛茸茸个手辣辣抓伊个肚皮伊讲。小猪猡吓的唻“吱~”一记顶开盖头豪稍跳出来。
哦哟啥地方还是啥个半夜三更，房间里向亮的唻眼睛也睁勿开好伐。原来啊，老里八早就已经天亮唻！埃只筐子里末堆满了稻草，葛咾拿光线侪倘牢了。葛咾小猪猡还当仔是半夜里，一眼也勿晓得已经天亮了。搿辰光，大筐里向传出来一片“叽叽叽”个声音。小猪猡探过头一看，呀！筐子里向一大群黄颜色个毛茸茸个小物事。原来伊一夜到趴辣鸡蛋高头睏觉，拿搿眼鸡蛋统统孵出小鸡来了。搿点小鸡辣辣筐子里闹猛啊，又是叫又是跳“叽叽叽，要出去！叽叽叽，要出去！”
小猪猡开心个讲，“乖宝宝，㑚覅急！”伊拿筐子一歪，小鸡来煞勿及统统冲出来，围辣伊身边叫“叽叽叽，妈妈妈妈！叽叽叽，妈妈妈妈！”
小猪猡哈哈大笑“勿对，我勿是㑚妈妈，㑚应该叫我小猪猡大师！我只不过是拿㑚孵出来而已，真正拿㑚养出来个，是鸡太太。㑚应该喊伊妈妈！”
小鸡再勿怪介许多来，伊拉还是围牢伊喊，“叽叽叽，妈妈妈妈！叽叽叽，要脚！要脚！”
小猪猡又哈哈笑“勿是脚！是吃！搿便当，㑚跟我来！”
介大一群小鸡侪统统跟牢伊拉个搿位“猪猡妈妈”跑到了院子里向。唏哩呼噜用伊个嘴巴从烂泥里向挖出来交关蚯蚓，小鸡们豪稍冲上去拼仔老命穷凿八凿。抢勿着个就喊“妈妈妈妈！我要脚！我要脚！”小猪猡豪稍喊，“覅急！覅急！侪有！侪有！”
大家还在听
