教学❤朗读第2期第4课《广东粤剧》

欢迎咨询粤语【付费VIP】学习班级 学心老师的微信公众号：hok-sam 课件在【微信公众号】，同步更新。 粤语文字表达，不配国语翻译。 推荐歌曲：莫文蔚《幻听》——流行音乐和粤剧的完美结合 第四课：广东粤剧 以前嘅广东人，好钟意听唱大戏㗎。“落花满天蔽月光，借一杯附荐凤台上”；“一呀叶，轻呀舟去。”，人人都唱得两句。一到重大嘅吉庆节日，啲戏班就会响广场度搭晒棚，整定个戏台嚟开唱。台上面就响度咿咿呀呀，台下面嘅大大细细就睇得开开心心。嗰阵时又冇乜其他嘅娱乐节目，开台唱戏就显得必不可少，属于大众同乐嘅一项活动嚟㗎。 但时至今日，后生仔放咗工之后，已经大把节目，上网、唱K、督波、蒲吧、打牌、打机、睇戏、行街……传统嘅粤剧就畀人冷落响一边。再加上唱粤剧本身系一项需要长时间去浸淫嘅行当，冇得三五七年嘅功力，嗰种一举手一投足嘅韵味，系根本就表达唔到出嚟嘅。 俗语都有话，“台上一分钟，台下十年功”呀嘛。你谂下，需要练十年咁耐噃，而家啲后生仔边度仲有咁好耐性，边度仲顶得住。所以放眼现今，粤剧人才嘅凋零，就可想而知。 家下粤剧市场暂时仲有啲睇头嘅，就只有香港呢个地方。好似阿姐汪明荃，就年年都同家英哥办番场粤剧专场，过下铺瘾。佢哋唱得比较多嘅曲目，《帝女花》同《紫钗记》就系属于经常性搬上台面嘅。《帝女花》后尾mei1仲畀人整咗个搞笑版嘅嚟唱添。我记得里面有一句，系“帝女花满面暗疮，撞正嗰个原来系色狼。”，好好笑。 噉讲番对粤剧文化嘅保护，除咗香港，响广州呢边，都做紧啲对粤剧嘅保护性工作。好似剧坛里面，比较有名嘅红线女，佢就开咗间粤剧学校，培育一啲粤剧嘅接班人。而市政府方面，亦都加大咗资金同人力嘅投入，开办一啲粤剧群体性活动，嚟增加群众对粤剧嘅喜爱同积极性。 不过计我话，其实传播粤剧，最需要嘅系一份“土壤”。如果可以开放多啲免费活动场所，畀啲阿伯阿婆去练下声唱下嘢；响学校里面，开展一啲粤剧兴趣班；响企业拉多啲赞助，过嚟帮补下粤剧行业，唔好净系去晒拍电影、电视剧。我谂呢啲举措，先至会帮到粤剧呢门古老嘅艺术，老树开花，焕发新生。