原创沪语歌曲：上海阁楼

MV：http://t.cn/Rqeh3bx 上海阁楼/崇洋迷外演义 词、曲、唱、制作：郑耀华 | 歌词 | 下半天一点钟 阿拉外婆饫我饫到打瞌充 我在听外滩钟 外国钟敲东方红 总算是一碗饭吃脱，阿拉外婆拿我关在阁楼高头，乃末要我睏中觉。我耳朵贴牢板壁，听到隔壁头人家屋里两个哥哥一个姐姐还在了白相还在了吵。外婆讲上趟之噢红卫兵噢居委会噢交关人噢侪拥到伊拉屋里向去抄伊拉家。后首来大楼里向个大人碰着兄妹三家头侪叫伊拉“啊唷小姐，啊唷少爷”。伊拉介大人哪能用勿着读书个啦？我一直在想，外加老开心覅打中觉。还好几趟迓迓叫带我到人民公园，拿只抱在许个照相机帮我拍照。拨我穿嗰牌小姑娘个尖头皮鞋，套伊拉阿妹个绒线马甲，戴顶外国草帽。横勿好，竖勿好，转过来眼，转过去眼，一歇要笑，一歇覅笑。有趟之好像拨两个大人盯牢了，伊拉吓得来“要死唻要死唻！”拉了我就逃，逃逃逃逃逃逃逃逃逃。 阁楼上眼睛张开 手摸着天花板 墙角落外国花瓣 浮起来一瓣瓣 南京路山西路 大理石大楼没人跳舞 大理石露梯转弯 四十份人家生煤炉 一直逃到永安公司有轨电车嗰面，伊拉买块蛋糕，讲今朝要好好较表扬我。有朵花个一瓜蛋糕四个人吃，到山西路弄堂口每个人要再揩趟嘴巴。伊拉屋里也有只阁楼，有趟拨我上去听耳机，“晓得伐，嗰叫做半导体”。“喔唷外国人在唱歌！”我哇一声叫出来，“嘘嘘下去！”马上拿我赶下去。下半天南京路上欢送上山下乡，老扎劲个大游行，我在等看阿拉小阿姨，伊到江西去。外婆拿我从橱窗横档高头拉下来，“看啥？阿拉回去！”伊用潮州言话骂我，好像在了落眼泪。我平常其实蛮听言话个，只有一趟，想自家一家头跑到外滩去。沿牢汉口路两旁边外国大楼，过脱三条横马路我就吓了臭要死。头也勿敢抬起来，生怕跟牢嗰眼大楼飘到天上去。 阁楼上眼睛张开 手摸着天花板 墙角落外国花瓣 浮起来一瓣瓣 呼呼烫灶披间 上头是宁波老头亭子间 两个儿子侪去插队 从早到夜门开了许 开始读书了我就回卢湾区合肥路，也是睏阁楼，因为屋里只有八平方米。放假辰光石库门煞静，中上热得来皮勿动，就溜到亭子间去。宁波老头是像坏分子，驼背像只熟个虾，睏条凹下去个席子。枕头旁边起码七八本书，勿是旧个就是破个，伊总归在看书。阿拉小人进去只要覅烦，伊头也勿回；我就拿本书瞎看，名字也勿晓得。夜到在自家阁楼上做梦，做到卡门挺拨人家杀脱，做到我自家影子拨人家偷脱。伊小儿子农场回来，一歇歇搭老头子吵吵，一歇歇吉他弹弹，一歇歇掯掯自家屋里。掯出来纸头豁嘞豁嘞个老大老旧老重个书，里向图画侪像照片，雕塑侪是裸体。老照片里大盖帽锃亮肩章刷挺，外国人就是神气，坏人就比好人神气，好人就比解放军神气。 阁楼上眼睛张开 手摸着天花板 墙角落外国花瓣 浮起来一瓣瓣 一向睏阁楼上 一半是睏觉一半在做梦 天亮之大家上班 我懒塌塌还在做梦 我睏过个两只阁楼，一只上头造置地广场，一只埋在勿晓得门牌个地方。我在纽约租间屁大个房间，倒勿大想读书辰光一直走过个淡水路思南路个洋房。下飞机第三天我从42街五大道下头头伸出来看到Bryant广场。头浑得唻噢就像小辰光在汉口路一模一样，我想我大概总算寻着家乡。不过介许多博物馆、介许多书里讲个地方，我没去过几垯，顶多马路趤趤。乃晓得，对我来讲，家乡就是好像想去，真在了旁边，我又懈嗒嗒个地方。难怪在了黄埔区、卢湾区、浦东新区、纽约皇后区，我侪懒洋洋。我晓得自家是垃圾瘪三个面相，勿晓哪能弄僵脱了变成遗老遗少个触气相。穷爷娘养出我只小资，睏过头，睏扁头，呒清头，外加懒到骨头里向。 阁楼上眼睛张开 手摸着天花板 墙角落外国花瓣 浮起来一瓣瓣 阁楼上眼睛张开 手摸着天花板 墙角落外国花瓣 浮起来一瓣瓣