广播196 弄堂茄山胡 弄堂年味

广播196 弄堂茄山胡 弄堂年味 2013-02-06 16:37来源：新民晚报 新民网编辑：田诗雍 文 / 杨保飞 　　■ 磨糯米粉 　　埃歇辰光，阿拉一个门档子里向有得七八家人家，家家人家过年包糯米汤团，侪要磨糯米粉。只有郑家姆妈屋里有得一只石磨。郑家阿三头垃拉腊月个月半横里，就拿石磨“请”仔出来，掸脱上头个积灰，用清水汏清爽。伊邪气个认真，拿仔一张纸头，跑到每家屋里，拿各人家“预约登记”用石磨个日脚记下来，到仔搿日伊会得“嗯吼嗯吼”拿石磨送得去，服务老老周到个，搿个辰光隔壁邻舍个关系真个比亲眷还要好！ 　　■ 做蛋饺 　　年夜饭个暖锅里放仔几只蛋饺，就好像放进去几只金元宝，黄澄澄，好看味道赞，呒没人勿欢喜个。辣拉凭票凭证个年代，买勿到新鲜鸡蛋，配给个冰蛋做一眼蛋饺。做蛋饺是要有一眼辰光个，我忙是忙得来，不过我还是老开心个，因为每个走过个人侪会夸我：“喔唷，香是香得来，侬做个蛋饺顶赞唻！” 　　■ 大年夜大扫除 　　到仔大年夜夜里，各家人家差勿多年夜饭侪吃好了，里弄小组长方阿姨带头出来大扫除，大家听到仔声音，侪会得派一个人参加，有个拎仔铅桶、有个拿只面盆、有个拿仔拖畚、有个带块揩布、有个拿把鸡毛掸帚，掸灰、扫地、拖地板、揩楼梯个栏杆扶手，人人侪有得事体做。侬绞好揩布、我马上搭侬倒脱龌龊水调盆清爽水，末脚一潽地板要拖得干眼，个把钟头下来，上上下下收作得清清爽爽。