广播215 弄堂茄山胡 摆渡

广播215 弄堂茄山胡 摆渡 2012-08-22 14:22 来源：新民晚报 作者：颜志忠 新民网编辑：王玲 　　 【新民晚报·推荐】老早点黄浦江浪摆渡侪靠小舢板个。搿种舢板人工摇橹，只好乘三四个人。我屋里住垃浦东，工作垃浦西，天天摆渡过江，渡口是南码头。 　　 埃个辰光，大轮船开过，小舢板一吃浪头，颠上颠下，还要打转。乘垃上头个人硬劲抓牢船帮，心侪吊拉海，生怕船翻脱。后头来，木头小船淘汰了，有了铁壳渡轮，外加越造越大，越造越好，摆渡呒没危险了。不过随着城区建设居民大批朝浦东搬，上下班高峰辰光摆个渡，变成一桩苦恼事体了。我就是垃埃个辰光开始轧摆渡个。每天早浪向踏脚踏车上班，一到摆渡口，就神经抽紧。等候摆渡个人老早满出轮渡站，远远叫望过去，大人小人脚踏车黄鱼车横七竖八乱糟糟。来一只渡船，人群朝前头移一点。总归要等四五班船再好轧进候船室。接下来垃通到码头个铁条栈桥浪向，还要拼命朝前冲，稍微木一点，就会关进铁栏门里向。轮船脱班，看过去只只尴尬面孔。上班辰光，啥人勿急？乃末，船浪个朋友帮忙再动一动，轧出空间来，让船下个人上船。 　　 囡儿小辰光读书，是我脚踏车荡来荡去摆渡过江个。记得伊读三年级搿年，一日子，轧煞轧死总算上船。呒没想到船刚刚开出去，碰着拖轮船队。长长一串过脱，又来一串，像“接龙”一样，江面全部封锁脱。渡船垃江心氽发氽发，等仔半半日日。囡儿急得要哭，讲学堂里搿抢整顿纪律，校长亲自垃校门口捉迟到。船一靠岸，我翻身上车，一路揿铃拼命踏，还是晚了。囡儿拨辣校长捉牢，一顿批评，终于哭出来，想想囡儿也蛮冤。轮渡公司倒也动足脑筋，上班过江高峰辰光，拿车渡当客渡用，拉过来拨上班族摆渡。老摆渡人习惯叫客渡“小摆渡”，叫车渡“大摆渡”。“大摆渡”有一只篮球场大，上头呒没顶棚，四面呒没遮拦，视野开阔，空气也绝对流通。一船足足好装三四百部脚踏车，黑压压一片。开起来劲道大冲势足，赛过像登陆艇。我欢喜乘“大摆渡”，过江快，还好抬头看看南浦大桥一段一段朝江心合龙个桥面，心里真望大桥早点造好。 　　 交关老摆渡熟面孔一个一个勿看见了，想来侪是从桥浪向“飞”过去了。“大摆渡”也停航了，搿个大身坯海蓝色个车渡船勿晓得开到啥地方去了。后头来，南码头轮渡站改建，拿客渡码头搭仔车渡码头连起来，好同时停泊两只渡船，就等于增开了一条对江轮渡线。轮渡站候船室里向挂一条“心系两岸，争创一流”标语，觉着邪气温暖。渡船一只接一只，工作人员操作协调，两扇大门轮流开启，安排乘客顺利安全过江。摆渡个人再也勿为等船心里急煞，也勿会勿上勿下吊牢轮船，啥辰光到码头啥辰光乘船，笃定泰山。 　　 现在，大桥、隧道、地铁等贯通黄浦江两岸，公共交通发展越来越快，过江难搿页历史也越来越远了。