广播249 弄堂茄山胡 汏浴往事

广播249 弄堂茄山胡 汏浴往事 　　文 / 郑自华 　　大冷天汏把热水浴，然后钻进暖烘烘个被头筒，是一桩老舒服也老正常个事体。但是，老底仔汏浴就呒没介便当了。 　　我老早住拉老式公房，呒没独立卫生，也就是讲呒没单独个汏浴设备。不过，再艰苦浴总归要汏，乃末因地制宜发明了“土浴室”：辣灶披间当中个一块空地，就是平常汏衣裳拣小菜个地方，拿后门、腰门关上，隐蔽性有了，由于是单亭子间，从晒台上可以看到下面，实际上就是半露天个浴室。夏天搭春秋天，勉强还能对付。到了冬天，汏浴就成了桩头痛事，曾经尝试移到房间里洗澡，但汏好以后，收捉、拖净地浪个水，身浪往往又是一身汗。在“土浴室”汏浴，事先将铜吊、热水瓶都装满了热水，尽管冷，由于热水勿断，一边汏，一边抖豁，告咾感冒是经常个事。也想过到“混堂”去，但想想价钱贵，冬天混堂又人轧人，汏点浴也是活受罪。 　　事情有了转机，老婆调到厂警卫室去了，专门看管大门，迭个看门，最大个权力就是可以放人进来汏浴。厂周围个居民侪老巴结门卫，目的就是搞好关系，以便高抬贵手。汏浴个时间一般辣夜里向8点半左右，搿个辰光中班呒没下班，常日班加班以后则下班了，而夜班又呒没上班，正好是空档辰光。我用脚踏车带上囡儿，到厂门口，先露个面，等到门房间里个人手招一下，好像搞地下工作一样，立马匆匆忙忙冲向汏浴间。10多岁个囡儿由伊姆妈交拨女同事，请伊拉关心一下，帮忙拿热水冷水调好。经常听见进汏浴间个人问：“水好？”开始勿懂，后来才晓得是指热水稳定？由于大炉间原因，热水忽冷忽热是经常发生个，再加上工厂浴室个水龙头每天有几百号人辣拧，合适个温度很难调，弄得勿好，热水当头浇来，烫伤皮肤，双脚跳，或者一盆冷水倒下来，搿能个尴尬真让人哭笑勿得。到老婆厂里汏浴勿是“隑牌头”个，是难板“戳一枪”，等老婆上中班，一般要三个礼拜才有一趟。放人进厂里汏浴也是偷偷摸摸，弄勿好厂领导会“杀差”（突袭检查）。查到了要“吃牌头”，严重个要扣奖金。所以汏浴要速战速决，我汏好以后，赶紧到门口等辣海，等囡儿出来，骑上车就走。 　　厂里一般辣春节前向职工家属发点进厂汏浴票子。迭个辰光阿拉一般勿轧闹猛。因为搿个时候，前来汏浴个人简直可以用下饺子来形容。 　　1997年，我搬家了，终于有了独立卫生，汏浴难也就成了往事。