广播专辑 弄堂茄山胡81 又是同学，又是邻居

广播175 弄堂茄山胡 又是同学，又是邻居 2013-11-11 17:52来源：新民晚报 新民网编辑：田诗雍 作者：任丽青 　　老早仔阿拉读中小学个辰光，班级里向有交关小朋友跟我又是同学，又是邻居，搿种关系对我个生活带来勿少好处。譬方讲要到学 堂去读书，一路上有道伴，一两站个路程讲讲笑笑、勾肩搭背，勿知勿觉一歇歇就到了。只有个别同学呒没邻居做道伴，路浪向总归蛮 寂寞个。搿辰光爷娘一般侪是双职工，根本勿可能接送子女去读书。有邻居做同学，放学以后也老开心个。阿拉可以跳橡皮筋、跳房子 、捉迷藏咾啥。下半天三四点钟一直到吃夜饭，弄堂里男小囡女小囡一帮子，闹猛得勿得了。从小学毕业开始，我跟同学阿萍个关系除 了邻居又多了一层，就是侪要相帮对方做家务。搿辰光装煤气个家庭特别少，大多数人屋里向要烧煤饼、煤球。阿拉两家人家买煤饼迭 桩事体就变成阿拉两个长女个任务了。煤球店倒勿远，就辣马路斜对过。每趟买煤饼我总归搭仔阿萍一道去，付好钞票要拿煤球卡押辣 店里，再借一副煤饼担子。煤饼担子上要摆三四格煤饼，每一格里有廿只煤饼，每只煤饼有一斤三四两。阿拉两个小姑娘抬起搿副煤饼 担子少讲讲有一百斤出头。到了屋里向，还要拿煤饼仔仔细细码好，两个人再抬起空担子到店里讨回自家个煤球卡。假使讲有一段辰光 生活开销比较紧张，还会买煤灰回来做煤饼，好节省几角洋钿。也是我跟阿萍一道到煤球店，拿煤球卡押辣店里，借一只桶跟一只煤饼 模子，两个人就抬一桶煤灰回去。一桶煤灰是50斤，要跑两趟，一共一百斤。煤灰抬回来就倒辣弄堂里，加一定比例个水，用模子加榔 头就可以做出煤饼。买煤灰一定要拣好天气，落雨是勿来三个。借模子是一个钟头一分洋钿，所以做煤饼动作要快。一开始阿拉屋里是 阿奶做，后来是我做，速度也越来越快了。煤饼做好要用铅桶拎到灶批间码好，压末也要到煤球店去还煤灰桶跟模子，付好借模子个租 金以后拿回煤球卡。 　　搿种日脚现在想想真是麻烦得勿得了，居然也过过来了。正是搿种日脚加深了同学之间个感情，生活上个磨炼往往使阿拉搿一代人 更容易变成好朋友。几十年过去了，大学同学之间个事体交关已经忘记了，但是，中学同学之间发生个故事倒记得清清爽爽。苦日脚虽 然终于结束了，但是，美好个回忆勿会褪脱。再看看眼前，家家侪是独门独户，邻居关系似有似无，同学相处也成了一道难题，怀旧个 感情也更加浓了。